Met verskeie toekennings wat reeds aan haar toegeken is, het Riana Nel haarself diep in die Afrikaanse musiekbedryf as sangeres én liedjieskrywer gevestig.
Na drie gospel-albums stel Riana haar album, Die Moeite Werd, vry en kruip diep in die harte van Afrikaanse musiekliefhebbers. Haar enkelsnit Dans, word ’n treffer wat tot vandag toe nog by spesiale oomblikke soos troues die klankbaan is.
Riana is ook verantwoordelik vir verskeie van haar kollegas se treffers en hulle staan tou om saam met haar ’n duet te doen - soos in die geval met haar en Bobby van Jaarsveld se Eens in ’n Leeftyd en haar en Die Heuwels Fantasties se Doen Net Wat Ons Wil.
Haar unieke vertolking van ou Country-gunstelinge is altyd ’n hoogtepunt van haar vertonings en so was sy ook een van die hoogtepunte by Country is Groot met Steve en Vriende.
